ZORTZI TA BAT BEDERATZI
anonimoa , XVIII-XIX. mendeak
Ene maitea, errazu,
Zerk hola xangrintzen zaitu?
Ikustera jinen nitzautzu,
Beraz kuraie har zazu,
Amodioz nahi ez badute,
Bortxaz eginen gaitutzu.
Ene maiteak igorri
Segeretuian goraintzi,
Ikustera joan nakion
Laster hilen dela naski;
Oi, baduela aspaldi
Ez nauela ni ikusi!
Lau eta zortzi hamabi:
Abendoan da Egu'erri...
Maitearekin pasa nitzazke
Nonbait zonbait oren-erdi.
Orenak ere joan litazke,
Izanez ongi-etorri.
Ene maitearen jendiak
Oro koleran jarriak,
Ezin jakin dezazketela
Ene gogoko berriak...
E'itekoak egin ditzatela,
Nik eginen tut eniak.
Gaizki erakarri naute
Hogenik batere gabe,
Mutil arin bat naizela.
Diruz ere miserable,
Ontsa eta aise nahia,
Lana aldiz guti maite.
Aberatsa naiz bihotzez
Bai eta omore onez,
Galda bezote berari
Egia purra ez denetz...
Zortzi ta bat bederatzi
Ez naiz hain xuhur presentez.
Pago bat eta bi pago:
Bien artean badago!
Guarda gaztea amari
Gehio agrada zaio,
Amak alaba guardari,
Gogotik emanen dio.
Ene maitea, guardarik
Ez duzu behar ni baizik.
Begiratuko zaitut nik
Etxeko etsaietarik,
Hoitabat urte beteta
Libro zaitezke hetarik.
Mixel, baduzu espantu
Ninduzuela kasatu.
Samatsetikan kasatuz
Egin dautazu afruntu,
Alabaren bihotzetik
Ez nuzu halere hustu.
Euri ondoan ateri,
Bihar, maitea, iguzki.
Eman dautazun fedea
Begira zadazu azkarki.
Ez egin kasu mikorik
Jeloskorren kantueri.
| anonimoak |
| mendeak |
| 15 |
| 16 |
| 17 |
| 18 |
| 19 |
| 20 |
| 21 |
| poemen aurkibide alfabetikoa |